ИВАНОВ Афанасий Егорович

ИВАНОВ Афанасий Егорович
ИВАНОВ Афанасий Егорович

ИВАНОВ Афанасий Егорович

(1919-1992)

Воинское звание — старшай лейтенант

06.1942 с. ыҥырыллыбыт, 11.1945 с. эргиллэн кэлбит. 1992 с. өлбµт, Булгунньахтаахха көмүллүбүт.

1919 сыллаахха Нам оройуонун Таастаах нэһилиэгэр дьадаҥы дьиэ кэргэҥҥэ төрөөбүт.

1939с. Намҥа оскуоланы бүтэрбит, кэтэхтэн Дьокуускайга учууталлар куурустарын бүтэрэн музыка учууталын аттестатын ылбыт.

Дойдутугар оскуолаҕа айа-тута үлэлээн эрэр уол 1942 с. бэс ыйын 20 күнүгэр сэриигэ ыҥырыллыбыт. Сэриигэ барарыгар доҕотторо гармошка бэлэхтээбиттэр. Сэрии суолларынан саха уолун кыайыыга сирдиир, санааны өрө көтөҕөр ырыалара дьиэрэһийбиттэр.

Иванов Афанасий Егорович танковай училищаны бүтэрбит, Соҕуруу фроҥҥа противотанковай батальон автоматчига буолбут. Салгыы 4-с гвардейскай Кыһыл Знамялаах Суворов, Кутузов уордьаннардаах Сталинградскай 51-с армия 4-с гвардейскай мотомехкорпуһун танкиһа, Т-34 орудие командира элбэх кыргыһыыларга сылдьан хорсуннук сэриилэспит. Сталинград, Сталино, Макеевка, Ворошиловград, Соур-Могильское иүһин икки сылтан ордук кэм устатыгар сиэрэй синиэлин устубакка кыргыспыт. Ити курдук хаан өстөөҕү арҕаа диэки үүрсэн Донбасс сиригэр тиийбит. Байыаннай суолун бүтэһигэ буолар дьылҕаламмыт сирэ – Апросиньевка куорат. Саха буойуна ыараханнык бааһырбыт. Амырыын сэрии киниэхэ хаһан да сүппэт чэри хаалларбыта – 24 саастаах эдэркээн уол сааһын тухары нүксүгүр буолбута. Госпитальтан тахсан баран, инники кирбиигэ сылдьан сэриилэһэр кыаҕа суох буолбут старшай сержант, танкистары үөрэтиигэ анаммыт.

Төрөөбүт дойдутугар «Аҕа дойду сэриитэ» II степэнэ уордьаннаах, сэттэ бойобуой мэтээллэрдээх, ол иһигэр «Сталинград оборонатын иһин» мэтээллээх, уҥа харытыгар оскуолкалаах үлэлиир кыаҕа суох, 1945 сыллаахха ыам ыйыгар кэлбит.

Кэлин кыайыы сылларын чиэстээһиҥҥэ Иванов А.Е. үстэ Сталинградка харах уулаах көрсүһүүлэргэ бара сылдьыбыт, кыргыспыт сирдэринэн айаннаабыт, Братскай могилаларга тыыннаах сибэккилэри уурталаабыт.

Булгунньахтаах оскуолатыгар таптыыр идэтинэн – музыка учууталынан 1966-1990 сылларга үлэлээбитэ, элбэх ыччаты ырыа алыбыгар уһуйбута. Кини оскуолаҕа духовой оркестры, 70-н тахса киһилээх хору тэрийбитин дьоно-сэргэтэ умнубат.

Кини үтүөкэн куоластаах ырыаһыт, мелодист этэ. «Тойон Арыы», «Күөрэгэй», «Хомус кутуллар дорҕооно» ырыалара күн бүгүҥҥэ дылы сөбүлээн ылланаллар. Фронтовик доҕотторугар анаабыт «Доҕотторум – фронтовиктар» диэн ырыата бойобуой олоҕун туоһута.

Афанасий Егорович кэргэнэ Ирина Иосифовна Трапезниковалыын 5 оҕону улаатыннаран үөрэхтээх дьон оҥорбуттара.