ФЁДОРОВ Афанасий Егорович

(1927-1982)

Воинское звание – старший лейтенант

1945 с. ыҥырыллыбыт, 06.1951 с. эргиллибит. 1982 с. өлбүт, Булгунньахтаахха көмүллүбүт

1927 с. 2 Дьөппөҥҥө төрөөбүтэ. 7 кылааһы Өктөмҥө бүтэрбитэ. 1945 с. Покровскайга 8-с кылааһы бүтэрбитин кэннэ армияҕа ыҥырыллыбыта. Бастаан стрелковай полка, кэлин 5 сыл 6-с гвардейскай танковай армия 111-с дивизиятыгар сулууспалаабыта. Ити кэмҥэ сэрии бүппүтэ. Ол да буоллар Япония милитаристарын кытта сэриигэ кини сулууспалыыр танкоремонтнай чааһа границаҕа резервэҕэ турбута. Фронтовой быһыыга Япония билиэннэйдэрин харабыллаабыттара. Старшай лейтенант отделение хамандыырынан, штаб үлэһитинэн сылдьан бойобуой техниканы, Т-34ж-2, «КВ» танкалары, самоходкалары өрөмүөннэспитэ. 6 сыл сулууспалаан, 1951 с. бэс ыйыгар дойдутугар төннүбүтэ. «Японияны кыайыы иһин» мэтээлинэн наҕараадаламмыта.

1951 с. балаҕан ыйыттан 2 Малдьаҕар оскуолатыгар начаалынай кылаас учууталынан, интернат иитээччитинэн үлэлээбитэ. 1960 сылтан Еланка начаалынай оскуолатыгар учууталлаабыта.

1965 с. 1 Малдьаҕар оскуолатыгар учууталынан, сэбиэдиссэйинэн анаммыта. 1972 с. сылтан Булгунньахтаахха күһүн, пенсияҕа тахсыар дылы, оскуолаҕа учууталлаабыта.

Афанасий Егорович төһө да уоттаах сэриигэ сылдьыбатар, фронтовой быһыыга-майгыга сулууспатын баран, буойун учууталынан ааҕыллар. Кини холку майгылаах, оҕону дьиҥнээх патриотическай тыыҥҥа иитэр учуутал этэ. Кэргэнэ Анисия Ивановналыын 2 уол оҕолоох интеллигентнай, дьоҥҥо-сэргэҕэ убаастанар ыал этилэр. Улахан уоллара Анатолий милиция үлэһитэ этэ. Хомойуох иһин, уолаттара эдэр саастарыгар олохтон туораабыттара.