УВАРОВСКАЙ Василий Николаевич

(1913-1982)

Воинское звание – младшай лейтенант

07.41 с. ыҥырыллыбыт, 0.4.44 с. эргиллэн кэлбит. 1982 с. өлбүт, Покровскайга көмүллүбүт.

Убайым 1913 с. төрөөбүтэ. Оччотооҕуга Дьөппөҥҥө оскуола суоҕа, онон Рассолодаҕа ситэтэ суох орто оскуоланы бүтэрэн, Дьокуускай куоракка киирэн икки орто үөрэҕи: учительскай училищены уонна финансовай техникуму бүтэрэн баран булгуччулаах байыаннай оскуолаҕа үөрэнэн офицер званиетын ылбыта. Онтон 1938–1939, 1940-1941 үөрэх сылларыгар I, II Дьөппөҥҥө учууталлаабыта. Сэрии буолбут сураҕын кытта киниэхэ ыҥырыы кэлбитэ. Офицер буолан маҥнайгы ыҥырыыга, бэс ыйын 27 күнүгэр фроҥҥа барбыта. Фроҥҥа тиийээт сэрии уотугар түбэспитэ. Хас да чаастарга пулеметчигынан, разведчигынан сэриилэһэн, 736-с стрелковай полкаҕа отделение хамандыырыгар тиийэ үүммүтэ. Хас да төгүл бааһырбыта, үтүөрээт даҕаны фроҥҥа хаста да төннөн сэриилэспит, ”Кыһыл Сулус” уордьанынан наҕараадаламмыт. 1942 сыл от ыйын 1 күнүгэр төбөтүгэр бааһыран, госпиталга өр сытан, 1944 с. дойдутугар эргиллэн кэлбитэ. Үөрэммит идэтинэн райфин отделыгар сыта ыалдьыар дылы үлэлээбитэ.

Госпиталга сытан, төһө да төбөтүгэр бааһырдар ханнык госпиталга сыппытын записной киниискэтигэр хоһооннорун кытта бэлиэтээбит: 1.07. – 16.07 – полевой госпиталь, 17.06 – 24.07 – Бологое, 25.07 – 02.09 – Кострома, 06.09 – 19.12 – Молотово. Маннык 6 ыйы быһа госпиталтан госпиталга көһөрөн эмтээбиттэр.

Бойобуой суолларын туоһулуур мэтээллэрэ — “Хорсунун иһин“, “Германияны кыайыы иһин“. Үлэтигэр сүрдээх эппиэтинэстээх, бэриниилээх этэ. Үлэтинэн наҕараадалара: “Үлэҕэ килбиэнин иһин“,“Аҕа дойду сэриитин сылларыгар үлэҕэ килбиэнин иһин“.

Инсуллаан (төбөтүн бааһырыыта бэргээн) өлбүтэ. Дьоҥҥо-сэргэҕэ, үлэтин коллективыгар олус убаастанар киһи, үлэһит быһыытынан биллэрэ.

Василий Николаевич олус сэмэй, көнө киһи буолан киһиргэнэр эҥин диэни олох утарара. Фроҥҥа сылдьыбытын, хайдах сэриилэспитин олох кэпсээбэтэ. “Дьон тэҥинэн сырыттаҕым”, — дии диирэ.

Уваровская Т.Н., балта, 2004с.